பொறுப்பான நுகர்வு (ரெஸ்பான்ஸிபிள் கன்ஸம்ப்ஷன்) இயற்கை வளங்களைப் பாதுகாக்கவும் நீடித்திருக்கும் நாகரிகத்தை (ஸஸ்டைனபிள் ஃபேஷன்) ஏற்படுத்தவும் முக்கியமாகும். நாம் நம் தனிப்பட்ட வாழ்க்கையில்  பொறுப்போடு நுகர சில எளிய முயற்சிகளை மேற்கொள்ளலாம்.

1.   துணிமணிகளை நினைத்தபோதெல்லாம் வாங்கிப்போடுவதைக் குறையுங்கள்; தேவைப்படும்போது மட்டுமே வாங்குங்கள்.

2.   செயற்கையிழைத் துணிகளையும் போலிப்பகட்டு நகைகளையும் வாங்குவதைத் தவிருங்கள் அல்லது குறைக்க முயலுங்கள்.

3.   நல்ல தரமான பொருட்களை வாங்குங்கள். மலிவாகக் கிடைப்பதால் தரத்தில் குறைந்த பொருட்களை வாங்குவதைத் தவிருங்கள்.

4.   உள்ளூரில் அல்லது உள்நாட்டில் தயாரிக்கப்படும் பொருட்களை வாங்குங்கள்.

5.   நீங்கள் பல முறை அணியக்கூடிய பொருட்களை மட்டும் வாங்குங்கள்.

6.   பல விதமாகப் பொருத்தி அணியக்கூடிய (மிக்ஸ் & மேட்ச்)  துணிமணிகளை வாங்குங்கள்.

7.   வாங்கிய உடைகளையும் அணிகலன்களையும் கவனமாகப் பராமரியுங்கள்.

8.   நல்ல நிலையிலிருக்கும் பழைய துணிகளை நவீனமாக வடிவமையுங்கள்.

9.   உடன்பிறப்புகள், உறவினர்கள் அல்லது நண்பர்களுடன் துணிகளை மாற்றிக் கொள்ளுங்கள்.

10.   ஒரே ஒரு சந்தர்ப்பத்திற்கு மட்டும் உங்களுக்குத் தேவைப்படும் ஆடைகளை வாடகைக்குப் பெறுங்கள்.

11.   தையல் பிரிந்த/லேசாகக் கிழிந்த உடைகளை உடனே தூக்கிப்போட வேண்டாம். அவற்றைத் தைத்து சரிசெய்யுங்கள்.

12.   பழைய/தேவையற்ற ஆடைகளைக் குப்பையில் எறிய வேண்டாம். அவற்றை யாருக்கேனும் நன்கொடையாக வழங்கலாம்.

13.    தேவையற்ற ஆடை அணிகளை மறுசுழற்சியோ மேல்சுழற்சியோ செய்யலாம்.

14.   தாம் நிலைபேற்றுத்தன்மையுடையவை (ஸஸ்டைனபிள்) என்று சொல்லிக்கொள்ளும் நிறுவனங்களைப் பற்றி நன்கு அறிந்து கொள்ளுங்கள். அவை பச்சையடிக்கவில்லை (க்ரீன்வாஷ் செய்யவில்லை) என்பதை உறுதிப்படுத்திக்கொள்ளுங்கள்.

எந்தப் பொருளை வாங்கினாலும் ஆராய்ந்து முடிவுகளை எடுங்கள், அவசரப்பட்டல்ல!

ஆடை அலங்காரத் துறை அதிக அளவு நீரையும் மின்ஆற்றலையும் பயன்படுத்தும் தொழில்துறைகளில் ஒன்று. நெசவுத்தொழில் உலக அளவில் மாசுபாட்டின் முக்கிய காரணமாக இருக்கிறது.

இயற்கை இழைகளைப் பொறுத்தவரை, பயிர்கள், இழைகள் மற்றும் ஆடைகளின் உற்பத்தி முதல் துணிகளில் சாயமேற்றுவது வரை---உலகின் பல பகுதிகளிலும் பற்றாக்குறையாக இருக்கும்---நீர் ஏராளமாகப் பயன்படுத்தப்படுகிறது. ஆயத்தஆடைத் தொழிற்சாலைகளில் இருந்து வெளியிடப்படும் நச்சுக் கழிவுகளால் ஆறுகளும் குளம் குட்டைகளும் மாசடைகின்றன.

பாலியஸ்டர் மற்றும் நைலான் உள்ளிட்ட செயற்கை இழைகளோ பல வழிகளில் சுற்றுச்சூழலுக்குத் தீங்கு விளைவிக்கின்றன. அவற்றின் மூலப்பொருட்கள் புதைபடிவ எரிபொருள்களிலிருந்து உருவாக்கப்படும்  பெட்ரோலிய வேதிப்பொருட்களிலிருந்து பெறப்படுகின்றன. செயற்கையிழைத் துணிகள் அலசப்படும்போது, ​​ மைக்ரோபிளாஸ்டிக் இழைகள் வெளியாகின்றன. இவை தண்ணீரை மாசுபடுத்துகின்றன; நீர்வாழ் உயிரினங்களையும் பாதிக்கின்றன. செயற்கையிழைகளாலான துணிகள் பயன்படுத்தப்பட்டபின் குப்பையில் எறியப்படும்போது, ​​அவை மக்குவதும் இல்லை.

சுற்றுச்சூழல்நல நாகரிகம் (இகோஃப்ரெண்ட்லி ஃபேஷன்) என்பது சூழல்நலம் பேணும் வளங்களிலிருந்து பெறப்பட்ட துணிகளைப் பயன்படுத்துவதை உள்ளடக்கியது. இத்துணிகளுக்கு எடுத்துக்காட்டுகள் பயிர்களின் இயற்கையிழைகளைக் கொண்டு உருவாக்கப்பட்ட துணிகளும் மறுசுழற்சி செய்யப்பட்ட இயற்கையிழை அல்லது செயற்கையிழைத் துணிகளுமாகும். சுற்றுச்சூழல்நல நாகரிகம் என்பதில் சுற்றுச்சூழல் உணர்வுடன் இருப்பது, குறைந்த எண்ணிக்கையில் துணிமணிகளை வாங்குவது, அவற்றை முடிந்தவரை பயன்படுத்துவது, கந்தலானால் மட்டுமே குப்பையில் போடுவது ஆகியவை அடங்கும்.

அறம்சார் நாகரிகம் (எத்திகல் ஃபேஷன்) என்பது சுற்றுச்சூழல் நலத்தைத் தவிர மக்கள் நலம், பிற உயிரினங்களின் நலம் போன்ற அம்சங்களையும் உள்ளடக்கியது. வளம் குறையா உற்பத்தி, பணியாளர் நலன், நியாய வர்த்தகம், விலங்குகள் நலன் போன்ற பல விஷயங்கள் இவ்வகை நாகரிகத்தில் அடங்கும்.

ஆடைத் தொழிலில் ஈடுபடும் தொழிலாளர்கள் அதிக நேரம் கடின வேலை செய்கிறார்கள். ஆனால் குறைந்த ஊதியமே பெறுகிறார்கள். பிற தொழில்கள் சிலவற்றில் போலவே, ஆடைத் தொழிலில் ஈடுபடும் பெண்களும் சிறுவர்களும் சுரண்டப்படுகிறார்கள். அவர்களின் கதைகள் மனதை உருக்குவன. அறம் என்ற சொல் வெவ்வேறு நபர்களால் வெவ்வேறு விதமாக விளக்கவும் புரிந்துகொள்ளவும் படலாம்.

நிலைத்திருக்கும் நாகரிகம், வேகமான நாகரிகம், சூழல்நல நாகரிகம், அறம்சார் நாகரிகம் போன்ற சொற்களால் நுகர்வோர் குழப்பமடையக்கூடும். நாம் விரும்பும் எந்தச் சொல்லையும் நாம் பயன்படுத்தலாம். மிக முக்கியமானது என்னவென்றால், பிராண்ட்கள் நெறியோடும் சுற்றுச்சூழலைக் கெடுக்கக் கூடாது என்ற கொள்கையுடனும் பொருட்களை உற்பத்தி செய்யவேண்டும். நுகர்வோர் என்ற வகையில் நாமும் சுற்றுச்சூழல் பற்றிய உணர்வுடன் இருப்பதோடு மட்டுமல்லாமல் ஆடைத்தொழிலில் உள்ள தொழிலாளர்கள் சுரண்டப்படும் நிலைமைகளையும் அறிந்து கொள்ள வேண்டும்.

கொவிட் பெருந்தொற்றுநோயால் நிகழ்ந்த முடக்கத்தால் புதிய ஆடைகளின் தேவை பெரிதும் குறைந்துள்ளது. நம் அலமாரிகளிலுள்ள துணிமணிகளை ஒழுங்குபடுத்துவதற்கும் சூழல்நலம் பேணும் விதத்தில் பொருட்களை நுகரப் பயிற்சி செய்யத்தொடங்குவதற்கும் இது ஒரு நல்ல சமயமாகும்.